Naragsakanan ni Presidente Ferdinand “Bongbong” Marcos Jr. iti panagkadkadwa dan kenni sigud a Bise Presidente Leni Robredo.
Nagsinnukat ti kablaaw dagiti dua kalpasan nga inawis ni Senate President Francis “Chiz” Escudero ni Robredo a mangidaulo iti panangsangaili kenni Presidente Marcos sadiay Sorsogon ken nag-alamano pay dagiti dua.
Iti panagbitlana iti ceremonial signing iti ARAL Program Act, nagyaman ni Presidente Marcos kenni Escudero gapu iti panangaramidna iti napateg nga addang tapno mapasamak ti napolitikaan a panagkappia.
Kinunana a nasayaat ti inaramid ni Escudero ken maragsakan ta natarimaanen ti relasionda kenni Robredo.
Maipalagip a naglaban dagiti dua iti politika idi 2016 no sadino a nangabak ni Robredo kontra kenni Presidente Marcos iti vice presidential race.
Nagsangoda manen idi 2022 presidential elections ken nangabak met ni Marcos para iti kinapresidente.
