BR LA UNION – Impasigurado ni Malacañang nga agsungbat dagiti adda iti likudan ti tanim-bala scheme idiay Ninoy Aquino International Airport (NAIA) nu mapaneknekan a nagsubli manen daytoy a modus kadagiti eropuerto.
Daytoy ti inwaragawag ni Communications Usec Claire Castro, kalpasan nag-viral ti video iti social media, kalpasan a na-intercept ti bagahe ti maysa a senior citizen iti airport idi Marso 6, kalpasan a maipagarop a nakitaan ti bala wenno anting-anting kadagiti arwatenna.
Iti press briefing idiay Malacañang, kinuna ti opisyal a saan a nasayaat no mapasamak manen daytoy a modus, nangruna no dagiti turista wenno pada a Pilipino ti biktima.
Impanamnama ni Castro a saan nga ipalubos ni Presidente Marcos daytoy.
Kinuna ti opisyal, apaman a malpas ti in-depth investigation iti nasao nga insidente, ken mapaneknekan nga adda sumagmamano a nagkukumplot iti daytoy, namnamaen ti publiko a maikkat dagitoy iti serbisyo.
