LA UNION – Nangibunong iti Provincial Government of La Union (PGLU), iti panangidaulo ni Governor Francisco Emmanuel “Pacoy” R. Ortega III, iti 1000 relief packs kadagiti innem a barangay ditoy syudad ti San Fernando, La Union, a naipasidong iti localized heightened community quarantine idi July 10, 2021.
Nangrugi idi Biyernes, Hulyo 9, ket naipasidong ti syudad iti General Community Quarantine nga agpatingga inton Hulyo 22, 2021, babaen iti bileg ti Executive Order No. 30, 2021.
Daytoy ket iti tarigagay ti lokal a gobyerno a malapdan iti lalo pay a panagwaras ti CoViD-19, kalpasan a nakita iti panagngato ti kaso idi naudi a lawas ti Hunyo agingga umuna a lawas ita a bulan ti Hulyo.
Base iti Covid Bulletin ti San Fernando idi July 11, 2021 nakailista ti syudad iti 33 a baro a kaso ti deadly virus; 31 dagiti baro nga immimbag ken agtaltalinaed a nangato ti bilang dagiti aktibo a kaso a dumanon iti 419.
