Agtultuloy ti panagsangpet ti tulong manipud nadumaduma nga pagilian para kadagiti dinuprak ti bagyong Kristine.
Mainaig iti daitoy ket nakatuding a makaawat ti Pilipinas ti binilyon a piso a gatad ti international aid manipud European Union, United Arab Emirates ken Taiwan.
Inaprubaranen ti European Union ti 1.5 million euros wenno katupag ti agarop P94 million nga humanitarian aid tapno matulongan dagiti nakaro a naapektaran a Pilipino aglalo idiay Bicol ken CALABARZON region.
Dagiti nadakamat nga emergency funding ket kanayunan pay iti 4.5 million euros a naitukon para iti Pilipinas tatta nga tawen, para met iti humanitarian aid.
Kasta met nga naiyanunsiyo idi Kalman idiay Taipei Economic and Cultural Office (TECO) a mangipaay da met iti donasyon a $150,000 wenno agarop P8.7 million iti gobierno ti Pilipinas kas panagpakita ti kompasyon ti Taiwan ken pannakipamaysa kadagiti pamilya a Pilipino a naapektaran dagiti bagyo.
Isagsagana metten ti United Arab Emirates ti donasyon a 33,000 a karton ti family food packs kas pangnayon kadagiti maar-aramid a relief operations.
Idauloan ti UAE Embassy a nakabase idiay Maynila ti panangimudmod kadagiti relief supplies nu sadino ket prayoridad a maikkan iti Bicol.
