ARINGAY, LA UNION – Opisialen a inaguraran ken nabendisionan idi Hulio 19 ti Plaza de Santa Lucia iti St. Lucy Parish idiay Aringay, La Union, kas panagyaman iti Namarsua para iti pannakaipasdek ti proyekto nga agserbi a lugar ti panagtitipon ken panagpartuat dagiti memoria para kadagiti sumaruno nga henerasion dagiti Aringayeños.
Nalpas iti konstruksion ti plaza idi 2021 babaen iti naindaklan a donor a ni Mrs. Priscilla Dulay Hunt, ken naipatungpal iti panangidaulo ti sigud a Parish Priest a ni Fr. Frederick R. Ferrer, a nagtarigagay a maaddaan ti maysa a pampubliko a lugar a mapagnumaran ti komunidad.
Indauluan ni Bishop Daniel O. Presto, D.D. iti panangbasbas ken panagrambak, kadua ti agdama a Parish Priest a ni Fr. Ranier Andrada, kadua da Fr. Liberato Apusen ken Fr. Norie Cubi, a nabigbig iti panagserbi ken panangidaulo da iti biag ti pammati ti parokya.
Dimmar-ay met iti okasion da Mayor Benjamin Sibuma, Vice Mayor Charito Sibuma, dagiti miembro ti Sangguniang Bayan, nangibagi ti Office of the Provincial Governor ti La Union, ken ti nangibagi kenni Mrs. Hunt a ni Ms. Nema Madarang kadua dagiti kabagian daytoy, kas pannakipamaysa iti historikal a panagrambak ti parokra.###
