LA UNION – Pa-imbestigaran ni Philippine National Police (PNP) Chief, Police Gen. Rommel Francisco Marbil, iti nabiit pay a waragawag ni Police Lieutenant Col. Jovie Espenido seknan iti imbutaktak na a “quota” ken “reward” system iti panawen ti kampanya kontra droga ti PNP wenno nalatak kas Oplan Double Barrel, nga impatungpal ti napalabas nga administrasyon Duterte.
Impaganetget ni Marbil a nadagsen iti nasao nga akusasyon ken nangigubway ti dackel a pakariribukan ti publiko.
Iti review panel, nga idaulwan ti Office of the Deputy Chief PNP for Operations (ODCO) ken buklen ti PNP Quad Staff, Internal Affairs Service (IAS), ken Human Rights Office, nabilin a sukimaten ken rekisaren iti Oplan Double Barrel, ken dagiti imbut-butaktak ni Espenido.
Karaman iti mandato ti review panel iti maysa a detalyado nga imbestigasyon ken panangamiris iti amin nga aspeto ti kampanya kontra droga, partikular dagiti adda pakainaigan iti karbengan pantao, operational protocols, ken accountability mechanism.
Impaganetget ti PNP Chief ti kinapateg ti nasao a panagamiris tapno masiguro a dagiti napalabas nga operasyon ket sumur-surot iti legal nga allagaden ken ethical guidlines.
