Awan latta ti sarday ti Philippine National Police kadagiti panangisayangkat da ti addang nu kasta ket malapdan ti panagngato ti bilang ti kaso ti dengue iti ranggo da.
Impaganetget daitoy ni PNP Public Information Office Chief Colonel Randulf Tuaño.
Kinuna ni hepe a maibasar ti datos ket dumanonen ti agingga 27 a pulis ti nakaptan ti dengue ita laeng tawen 2025.
Daitoy ket nangatngato nu maidasig ti 12 a kaso idi napalabas a tawen iti isu metlaeng a bulan.
Manipud ti datos ti PNP, nailista dagiti kaso sadiay Region 5, Region 8, Region 13, ken National Capital Region.
Binallaagan met ni Tuaño dagiti pada na a pulis nga agannad babaen ti panagusar kadagiti atiddog a kawes, insect repellants, ken dadduma pay a kapada nga wagas.
