Tutokan itan ti Philippine National Police (PNP) iti maysa nga espesipiko a paset ti Kingdom of Jesus Christ (KOJC) compound no sadino a mapapati a naduktalanda ti heartbeat, 20-30 meters manipud iti uneg ti daga babaen ti panangusarda iti ground breaking penetrating radar.
Segun kenni PNP Spokesperson Colonel Jean Fajardo, us-usaren da daytoy a detector kadagiti search and rescue operations tunggal adda didigra ken nu agsapsapulda kadagiti pagilasinan ti biag.
Marikna pay ti PNP a laplapdan dagiti followers ni Quiboloy nga umasideg iti lugar a puntiriada.
Patien ti PNP nga aglemlemmeng iti uneg ti daga ti pugante a pastor Apollo Quiboloy kasta met dagiti kaduana nga akusado.
Kalpasan daytoy, impasigurado ni Fajardo nga asidegen a masarakanda ti nalimed nga entrada daytoy nga underground.
Kabayatanna, inaresto ti PNP ti dua nga indibidual a kameng ti KOJC kalpasan a mapapati a nangipilitda a sumrek iti compound iti laksid ti kiddaw a saanda a mapalubosan a sumrek bayat nga agtultuloy ti search and rescue operations ti pulisya.
Segun kenni Fajardo, saan nga agsardeng dagiti polis nupay nabannog, siririing ken mabisin kas maitunos iti direktiba ni PNP Chief General Rommel Francisco Marbil.
