BR LA UNION – Agtultuloy iti panakikoordinar ti Police Regional Office 1 kadagiti lokal a gobierno ken kadagiti nadumaduma nga ahensia para iti panagsagana ken panagtinnulong kadagiti saan a ninamnama a pasamak wenno insidente inton Undas.
Paset ti prepasion iti panangisayangkat ti public awareness campaign, panangiwaras dagiti health tips, safety tips, ken crime prevention tips.
Agtultuloy met iti panangideploy dagiti kapulisan para iti police visibility, police presence, panang-manehar ti trapiko, ken panakaipatungpal dagiti agraraira a linteg ken lokal nga ordinansa.
Segun kenni Pmaj Divina Albino, maiwaras dagiti nasurok-kumurang 4,000 a pulis, kabinnulig dagiti 6,000 force multipliers a buklen dagiti regional services, barangay tanod, medical volunteers, ken non-government organization – kadagiti lugar a manamnama ti panagdupodop dagiti tattao, kas dagiti pampubliko ken pribado a sementeryo, simbaan, bus terminal, recreational parks, malls, ken motorist assistance centers tapno masigurado iti kinatalged dagiti umili.
Malaksid ditoy ket adda pay dagiti innem a grupo nga agserbi kas roving medical teams ditoy Rehiyon 1 nga agrikos kadagiti sementeryo tapno mangipaay ti madagdagos a tulong-medikal.
Kabayatanna, nagbalakad iti kapulisan kadagiti agbiahe ken agturong kadagiti sementeryo:
Para kadagiti agbiahe ket kasapulan nga isagana iti lugan ken lagipen ti BLOWBAGETS wenno ti battery, lights, oil, water, brake, air, gas, engine, tire, ken self.
Para met kadagiti agturog kadagiti sementeryo ket agitugot ti proteksion kontra ti init ken tudo, mangala ti umdas a makan ken inumen, ken bantayan dagiti kadua nga ubbing ken nataengan.
Maiparit met iti agitugot dagiti natatadem wenno makapatay a banag, gamit pangsugal, speakers, arak ken tagilako.
Napateg met nga amuen iti lokasion ti first aid station ken PNP assistance desk.
Sakbay a rumuar kadagiti pagtaengan, siguraduen nga awan ti maibati a nakasindi nga kandila, ikkaten dagiti naksaksak nga electric appliances, gas stoves, ken gripo.
Siguraduan met a naka-lock amin a tawa ken ridaw, tapno maliklikan iti insidente ti panagtakaw wenno panaggundaway no awan dagiti bumalay.
Innayon pay ni Pmaj Albino, adda ti agraraira a linteg ken sumango iti maiyannatup a kaso dagiti aglabsing kadagiti nadakamat nga alagaden.
Inallukoy pay ti pulisya iti publiko a makitinnulong kadagiti pulis, ken isayangkat iti panagrambak ti Undas babaen ti naulimek ken nakappia a wagas.###
