Binilin ni Presidente Ferdinand Marcos Jr. ti Department of Justice (DOJ) ken ti Philippine National Police (PNP) a mangaramid kadagiti addang para iti proteksion dagiti piskal ditoy pagilian.
Segun kenni Presidente Marcos, napateg ti akem dagiti piskal iti pannakaitandudo ti hustisia aglalo kinunana a sumsumrek ditoy pagilian iti baro a paset ti pannakaipatungpal ti linteg ken prosekyusyon.
Impaganetget ti presidente a tunggal kaso a mataming, tunggal desision a maaramid ken tunggal reporma a maitandudo ket dakkel ti epektona kadagiti Pilipino ken iti Pilipinas.
Idi kalman, nangirugi ti DOJ kadagiti baro a pagannurotan para iti pannakaisayangkat dagiti umuna nga imbestigasion a mangpapartak iti proseso ti panagdengngeg kadagiti kaso.
Innayon pay ti presidente a ti baro a pagannurotan ket mangipasigurado iti hustisia ken maiparbeng a proseso bayat ti panangsalaknib ti gobierno ti amin nga umili na, pakairamanan dagiti naidarum ken pagdusaen dagiti nakabasol.
