LA UNION – Rinibon a lokal a turista iti mapatta-patta a nakapadasen a simarungkar iti Bilagan Road idiay ili ti Santol, La Union.
Iti pannakiuman ti Bombo Radyo kenni Municipal Information and Tourism Officer Ma. Thersa Lynn Senen, kinunana a mapatta-patta a 300 aggingga 400 a turista dagiti sumarsarungkar iti inaldaw ti nasao a lugar lalo iti weekend.
Sigun kenni Senen, no pay adda iti pandemya ti COVID-19 kagiddan iti pananglukat iti tourist spot ket nainget iti ipatpatungpal iti lokal a gobyerno ti Santol iti safety protocol.
Sakbay a mapalubusan dagiti bisita nga agpasyar iti Bilagan Road ket maalaanda pay iti body temperature, agpirma iti waiver ken agpa-rehistro pay dagitoy para iti contact tracing.
Adda met iti bayadan a P25 nga environmental fees ti kada sumarungkar a turista iti nasao a dalan.
Nagpalagip met ti opisyal kadagiti agtartarigagay nga agpasyar a sumurot iti protocol ken pagtalinaeden a nadalus ti nadakamat a lugar.
Nabigbig ti Bilagan Road wenno ti nabirngasan kas “The Great Road of Santol” gapu iti napintas a kurte iti kalsada a naaramid iti tutok iti bantay a no agpagkanito a mamingmingan ket arigna a kaar-arngi iti “The Great Wall of China”.
Mas napinpintas iti buyana ti Bilagan Road lalo no dumteng iti ‘sunset’ wenno iti ililenned ti init a kasla silaw a nakadisso iti maysa a turod iti laud a paset ti nasao a kalsada.
