Diningeg ti Regional Trial Court (RTC) ti Lapu-Lapu City idi kalman iti mosion nga ibasura iti warrants of arrest a naipila kontra iti contractor a ni Sarah Discaya maipanggep ti ₱96.5-million “ghost” flood control project idiay Davao Occidental.
Kiniddaw ni Atty. Michael David nga ibasura iti warrant of arrest kontra iti kliyentena nga immunan a naarestar ken naibalud idi napalabas a bulan.
Nangipila met ti mosion dagiti legal counsel ni DPWH District Engineer Rodrigo Larete ken dagiti walo nga opisial ti Department of Public Works and Highways (DPWH) Davao Region tapno ibasura iti information ken warrants of arrest kontra kadagiti kliyenteda.
Inrason dagiti abogado nga awan ti hurisdiksion iti RTC Branch 27 ti Lapu-Lapu City tapno dinggen iti kaso gapo ta dagiti akusado ket saan nga high-ranking officials, ken addaan laeng ti salary grade a nababbaba ti 27. Ti kangatuan nga opisial a napilaan ti kaso ket ni Larete nga addaan ti salary grade 25.
Kenuna met ni Atty. Joseph Randi Torregosa, abogado ni Larete, a nasken nga idiay Davao Occidental a madingeg iti kaso gapu ta idiay iti maipagarup a nakapasamakan ti krimen.
Maipalagip nga inyalis ti RTC Branch 20 ti Malita, Davao Occidental iti venue ti kaso idiay Lapu-Lapu City kas maibasar iti Supreme Court guideline a nairuar idi Nobiembre. Nupay kasta, impaganetget ni Torregosa a saan a pormal a napaka-ammuan iti kliyentena maipapan iti nadakamat a desision.
Mainaig ditoy ket nangipila met ti mosion ni Ombudsman Mindanao prosecutor Atty. Marie Josephine De Vera tapno maisubli iti venue ti hearing.
Manamnama a mangiruar ti resolusion iti RTC Lapu-Lapu City seknan kadagiti mosion sakbay ti Enero 13, 2026, iti naituding a petsa ti arraignment dagiti amin nga akusado ti nasao a flood control project case.###
