Inyunay-unay ni Senador Ronald “Bato” dela Rosa a saan koma a makiraman dagiti politiko iti programa ti Department of Social Welfare and Development nga Ayuda para Kapos ang Kita Program wenno AKAP.
Nupay inlawlawag ni dela Rosa a saan daytoy a kontra iti pannakaiwaras ti tulong kadagiti marigrigat, inpetteng ti mammanday-linteg a ti DSWD ti rumbeng a mangasikaso ti panagiwaras ken saan a dagiti politiko.
Daytoy ket kas iti impakdaarna a mabalin nga maaramat ti AKAP ken dadduma pay a social assistance programs tapno magun-od ti botos dagiti umili, nangruna iti masungad a 2025 national and local elections.
Iti baet ti posible a pannakaaramat ti AKAP iti 2025 national and local elections, dinagadag ni Dela Rosa iti Commission on Elections (Comelec) a mangiparit ti pannakaiwaras ti financial aid kabayatan ti kampania.
Kinuna pay ti senador nga awan ti problemana no saan a maikkan ti opisinana iti alokasion manipud iti binilion a pondo para iti AKAP iti sidong ti 2025 national budget.
Inaramid ti mammanday-linteg ti nasao a statement kasaruno ti report a ti P5 billion allocation ti AKAP ket mailasin para iti panangiwaras dagiti senador ita a tawen.
