Pinasingkedan dagiti maseknan nga ahensia ti gobierno nga awan pay iti listaan da kadagiti nagan dagiti benepisiario para iti yuda sa Kapos ang Kita o AKAP Program uray no nag-roll out daytoyen idi napan a tawen.
Iti hearing ti Senate Committee on Social Justice, Welfare and Rural Development, nababalaw ni Senador Imee Marcos ti Department of Labor and Employment (DOLE) ken Department of Social Welfare and Development (DSWD) iti kaawan da ti listaan dagiti nagan ti minimum ken below minimum wage earners a mawarasan ti ayuda.
Kinuna ni Dole Undersecretary Benjo Santos Benavidez nga awan ti nagan da kadagiti empleado nga agsusuweldo iti below minimum ken ti datos nga adda kadakuada ket dagiti laeng minimum wage earners.
Nupay kasta, kinunana nga adda proseso latta tapno maammuan no siasino ti agsusuweldo iti kabassitan kadagiti kompania ken maysa kadagitoy ket ti surbey ti Philippine Statistics Authority (PSA) iti tunggal kompania a nakailistaan ti lima a milion nga empleado ti minimum wage.
Pinasingkedan met ni DSWD Undersecretary Aliah Dimaporo nga awan ti listaan dagiti benepisiarioda para iti programa ti AKAP.
Inrason ni Dimaporo nga nupay awan ti listaan, addaan da met kadagiti pagannurotan ken kasapulan tapno umawat iti programa.
Nagririri met dagiti dadduma a grupo nga nababbaba pay ngem minimum ti suweldo da agsipud ta dagiti manen minimum wage earners ti unaen ti AKAP imbes nga isuda nga awan ti mabirbirukan na.
Segun met iti DSWD, sabali pay ti programa ti ahensia para kadagiti awanan trabaho.
Insingasing ni sigud a Supreme Court Associate Justice Antonio Carpio nga ipablaak dagiti nagan ken gatad dagiti nakaawat ti AKAP ken nu sino dagiti nangirekomendar kadakuada.
