BR LA UNION – Inruaren ti Department of Education (DepEd) iti opisyal nga school calender para iti School Year 2026-2027.
Segun iti DepEd, mangrugi ti serrek iti pagadalan inton Hunyo 8, 2026 ken agleppas inton Abril 8, 2027.
Iti nasao nga school calendar ket pormal a maiyam-ammo iti three semister kas paset ti reporma, nga addaan tarigagay tapno mapasayaat ti panagisuro ken mapullatan iti learning gaps.
Adda pakabuklan a 201 nga aldaw ti sibubukel nga school year ken mabingay daytoy ti tallo a termino.
Kada termino ket mangrugi iti opening period, instructional phase ken end-of-term activities.
Ti first term ket manamnama a mangrugi inton Hunyo 8-11 a mapasarunwan ti regular classes inton Hunyo 15 ken agleppas ti Setyembre.
Bayat a ti maikadwa a termino ket manipud katengngaan ti Setyembre agingga iti umuna a lawas ti Disyembre ken agleppas iti end-of-term activities sakbay ti holiday break.
Kalpasanna, mangrugi manen ti serrek iti Enero para iti maikatlo a termino ken agleppas iti maudi a lawas ti Marso a mapasarunwan ti final assessments ken closing activities ti Abril 2027.
