BR LA UNION – Gapu iti nagsasaruno nga insidente ti pammaltog ken pammagsol a napasamak iti sumagmamano a pagadalan iti nagduduma a lugar ditoy pagilian, pinapigsa ita ti pulisya ti pannakaipatungpal ti School Visitation program iti intero a probinsiya partikular ditoy siyudad ti San Fernando kas wagas tapno masiguro ti kinatalged dagiti estudyante, mangisursuro, ken amin nga school personnel.
Kinuna ti La Union Police Provincial Office (LUPPO) nga idaulwan ni Police Colonel Redentor C. Ulsano, a maysa daytoy nga immediate ken protective response kasaruno ti trahedya idi Hunyo 22, 2026 a pammaltog iti maysa a pagadalan idiay Tacloban City.
Nabilin amin nga istasyon ti pulisiya ditoy probinsiya a mangisayangkat ti regular campus visit tapno ma-secure dagiti learning facilities, mangisayangkat ti bag inspection, ken mapunas ti panagdanag dagiti estudyante, teachers, ken nagannak.
Tarigagay pay ti aktibidad a mapapigsa ti koordinasyon ti pulisiya ken eskuwelaan iti panangisayangkat ti security assessment, ken masigurado a nakasagana ti tunggal pagadalan para iti aniaman a posible a pangta iti seguridad.
Kabayatanna, nagpalagip ni PMAJ Arcelli Pang-ag, Public Information Officer ti La Union Police Provincial Office, nasken nga adda ti kooperasyon ti publiko tapno maliklikan ti aniaman nga insidente.
Binalakadanna dagiti gun owners ken uray dagiti agik-ikot ti lisensiyado a paltog, nga idulin wenno ilemmeng dagiti armas iti natalged a lugar, kas iti cabinet wenno container nga addaan ti kandado, tapno saan a nalaka a makita wenno magaw-at dagiti ubbing.
