Impalgak ni sigud a Philippine Charity Sweepstakes Office (PCSO) General Manager Royina Garma ti maysa nga indibidwal a nasinged kenni Senator Bong Go mainaig iti financial operations ti kontrobersiyal a nadara a gubat kontra droga ti Administrasyon Duterte.
Iti testimonia ni Garma idiay House Quad Committee idi Biernes, binigbigna ti alias “Muking” a nangilasin kenkuana a kas ni Espino, a staff member ni Go iti opisinana iti Davao City Hall idi mayor pay ni Duterte ken nagtultuloy a nakipagtrabaho kenni Go agingga a nagbalin nga Special Assistant to the President idiay Malacañang, ken nagserbi kas Assistant Secretary iti opisinana.
Impalgak ni Garma iti komite ti mapapati a reward system para kadagiti EJK.
Iti affidavit ni Garma, intudona da ni sigud a PRRD ken Go a nangipasdek iti nationwide war on drugs campaign a nagresulta iti adu nga saan a nainkalintegan a pammapatay.
Kinuna ni Garma nga idi 2016, nakiuman kenkuana ni Espino tapno alaen ti contact information ni dati a Criminal Investigation and Detection Group (CIDG) Region 11 Chief Colonel Edilberto Leonardo basar iti kiddaw ni ex-PRRD.
Inrekomendar ni Garma ni Leonardo a mangidaulo iti national anti-drug task force a mangtulad iti Davao Model.
Im-imbitaran met ni Quad Comm overall chair Surigao del Norte 2nd District Representative Robert Ace Barbers ni Espino a dumar-ay iti panagdengngeg.
Indetalye ni Garma ti relasion ni Espino ken ni Peter Parungo, maysa a non-PNP personnel a nangimanehar iti dakkel a kantidad ti kuarta a naipatulod kadagiti nadumaduma a bank accounts bayat ti kangitingitan ti drug war operations.
Segun kenni Garma, inyebkas ni Parungo ti pannakaseknanna gapu iti dakkel a kantidad a sumsumrek iti account na.
Kabayatanna, nailasin a dagiti accounts ni Parungo iti Metrobank, BDO, ken PS Bank ket primary conduits kadagiti transaksiyon.
Iti agdama, imbestigaran ti Quad Comm ti intersections dagiti illegal a Philippine offshore and gaming operators (POGO), drug syndicates, ken drug-related EJKs.
Manamnama met nga ipalgak dagiti mammanday-linteg ti nagbalin nga akem wenno partisipasyon ni Espino.
Inton sumaruno a hearing ket manamnama a mangikeddeng ti pinansial nga aspeto ti kampania kontra iti droga.
Kinuna ni Barbers a napateg a suroten ti money trail iti daitoy nga illegal nga aramid.
