LA UNION – Rimuar idi kalman iti isyu ti stolen identity ken ni suspended Bamban Mayor Alice Guo kalpasan nga imbutaktak ni Sen. Risa Hontiveros iti baro a diskubre na, nga adda pay iti sabali nga Alice Guo, maibasar iti record iti National Bureau of Investigation (NBI), ngem nagduma ti ladawan dagitoy.
Iti agtultuloy a panagdengngeg iti na-raid a POGO hub idiay Bamban, Tarlac kinuwestyon ni Hontiveros iti pudpudno a pakabigbigan ni Guo kalpasan a naiprisinta ti nakailanad iti NBI document a litrato ti dua nga Alice Leal Guo, nga addaan ti agpada a birthday nga Hulyo 12, 1986, agpada a Tarlac iti lugar a nakaipasngayan.
Sinalodsod ni Hontiveros nu siasino iti babae nga adda iti ladawan ken Ayanna itan daytoy.
Immuna ti daytoy, inruar ni Sen. Sherwin Gatchalian iti record manipud Board of Investments nga aplikasyon ti pamilya Guo para iti Special Investors Resident Visa (SIRV) ket nakaikabil sadiay a maysa a Guo Hua Ping ti simrek ditoy Pilipinas idi Enero 12, 2003 ket agtawen laeng idi ti 13-anyos.
Kiniddaw ni Hontiveros iti NBI iti biometrics ni Guo Hua Ping ken Mayor Alice Guo tapno pagkumparaen iti fingerprints dagitoy.
