LA UNION – Indagadag ni Senador Lito Lapid kadagiti kakaduana idiay Senado nga aprobaran a dagus ti gakat para iti standardization ti sueldo ken benepisio dagiti barangay officials ditoy pagilian.
Kinuna ni Lapid nga isu ti nangipila iti Senate Bill No. 270 wenno ti Act Standardizing the Salaries and Benefits of Barangay Officials idi Hulio 11, 2022 nem agingga ita ket pending pay laeng iti committee level.
Mangnamnama ti senador a mabalin a maiyeskediul ti diskusion iti singasing iti pannagsubli ti session inton Hulio 22.
Pinasingkidan ti senador a dakkel ti maitulong ti nasao a singasing tapno maipaayan ti umdas nga insentibo ken sueldo kadagiti Opisiales ti Barangay a isu iti agserserbi a frontliners kadagiti umili ken mangipatpatungpal ti kappia, urnos ken panagdur-as iti tunggal komunidad.
