Inawagan ni House Assistant Majority Leader Ernix Dionisio Jr. manipud Maynila dagiti botante a saan nga ibotos dagiti kandidato nga adda pakainaigan na ti maiparit a Philippine Offshore Gambling Operators (POGO) inton May 12 elections.
Impaganetget ni Dionisio nga adda dagiti agtarigagay a kandidato a makaal-ala ti suporta manipud kadagiti POGO ken sigurado kunana a protektaran da dagitoy apaman a mangabak da iti pwesto.
Mamati isuna a ti desisyon ti Presidente nga ipawil ti POGO ket maysa kadagiti makagapo nu apay a naikkat ti Pilipinas iti money laundering watchlist ti Financial Action Task Force (FATF).
Kabayatanna, inunay-unay met ni House Minority Leader Zia Alonto Adiong manipud Lanao del Sur a ti imbestigasyon ti Quad Committee iti POGO ken dagiti kriminal nga aktibidad a mainaig iti daitoy ket karaman pay a nakatulong tapno maikkat ti pagilian manipud ti FATF watchlist.
Uray ni Presidente Ferdinand Marcos Jr ket nagpanawagan kadagiti botante a saan nga suportaran dagiti kandidato nga adda pakainaigan da iti napalabas nga administrasyon, nupay saan na met a dinakamat ti nagan ni Presidente Rodrigo Roa Duterte.
