LA UNION – Direkta a kinarit ita ni House Speaker Martin Romualdez ni Vice President Sara Duterte nga ipalawag iti maipagarop a bidut a panangusar ti 612.5 million pesos a confidential funds ti OVP ken Department of Education.
Iti mensahe na iti plenaryo ita nga aldaw, binuweltaan ni Romualdez ni Duterte kasaruno ti pangta ti bise presidente nga adda binilin na a tao a mangpatay kenkuana, agraman iti first couple nga isuda President Bongbong Marcos ken First Lady Liza Araneta-Marcos.
Segun kenni Speaker Romualdez, maka-alarma iti waragawag ni VP Sara ken nakabut-buteng nangruna ket saanen a normal a sarita daytoy, ngem ketdi direkta a pangta iti demokrasya, iti gobyerno ken seguridad ti pagilian.
Dinipensaan pay ni Romualdez iti Kamara kontra iti atake ken breach of protocols nga inaramid ti bise-presidente ken nagpanawagan kadagiti kakadwa na a mammanday linteg a protektaran iti integridad ti institusyon.
Maipagarop nga awan ti basaran dagiti alegasyon a pad-padaksenna ni Duterte gaputi ambisyon iti pulitika inton 2028 ken maibilang a desperado nga addang tapno ibaw-ing ti pudpudno nga isyu.
Kumbinsido iti Speaker a ti makagapo iti awan basaran nga akusasyon ni Duterte ket iti gandat a kalluban iti pumigpigsa nga ebidensya iti biddut a pannaka-usar ti pondo iti sidong ti liderato daytoy.
Impaganetget pay ni Romualdez a saan nga optional iti panagsungbat ken saan a negotiable iti transparency isunga siasinuman a pakai-talkan ti pondo ti ili ket rumbeng a nakasagana nga agpalawag nu sadino ken kasatnu daytoy a nagastos.
