LA UNION – Nailista ti state weather bureau iti nababa a temperatura iti sumagmamano a lugar idiay Cordillera Administrative Region ita a lawas.
Kagiddan iti panagraira ti Hanging Amihan, dandani makalawas a nakailista ti nababbaba ngem iti 15°C a temperatura iti nasao nga ahensya iti sumagmamano a lugar idiay Benguet.
Maibasar iti monitoring ti Agromet Station ti nasao nga ahensiya a nakabase idiay Benguet State University idi Disyembre 20, nailista idiay La Trinidad ti 14.1°C a temperatura.
Idiay Baguio City, nailista iti kababaan a temperatura idi Biyernes a 14.4°C.
Idiay Tuba, Benguet ti addaan kalammiisan a temperatura nga immabot ti 12.7°C .
Namnamaen a lalo pay a bumaba iti temperatura kadagiti nadakamat a lugar bayat a lalo pay a pimmigsa iti epekto ti Amihan.
Mabalin a dumanon iti 10°C iti kababaan a temperatura iti kangitingitan ti panagraira ti weather system, maibasar iti patta-patta ti weather agency.
Iti record, 6.3°C ang kababaan a temperatura a narikna idiay Cordillera iti kangitingitan ti Amihan season.
