Im-imbestigaran ita ti Department of the Interior and Local Government (DILG) dagiti sumagmamano a Mayor ken lokal nga opisyales idiay Cebu gapo iti panagbiahe da iti ballasiw-taaw sakbay nga agduprak ti Bagyong Tino.
Ti panagduprak ti Bagyong Tino ket nakatayan dagiti nasurok dua gasot a tattao ken agingga ita ket dumanon latta ti nasurok a gasot dagiti mapukpukaw.
Segun kenni Assistant Provincial Administrator Aldwen Empaces, imbilin ti DILG Central Office idiay Kapitolyo ti Cebu a mangisubmitir kadagiti travel orders ken maiyannatop a dokumento tapno madakamat nu adda iti legal a basaran ti biahe dagiti opisyales.
Karaman kadagiti inikkan ni Gobernador Pamela Baricuatro ti Foreign Travel Authority (FTA) ket dagiti nagduduma a Mayor ti Cebu agraman ti maysa a Provincial Board Member a ni Andrei Duterte. Inlawlawag met ti Gobernadora a dagiti nasao a travel authority ket pirmado sakbay pay a nagduprak ti bagyo ket dadduma pay a didigra iti probinsya.
Maipalagip nga adda sadiay London ni Tourism Secretary Christina Garcia Frasco idi Nobiembre kwatro kas mangidadaulo iti delegasyon ti Pilipinas para ti World Travel Market.
Idi nadamag iti didigra ket dagos isuna a nagsubli ditoy Pilipinas kadwa iti asawa na a ni 5th District Representative Duke Frasco tapno idauloan met ti relief operations idiay Cebu.
