BR LA UNION – Agtultuloy iti isay-sayangkat nga imbestigasyon ti Bureau of Fire Protection iti napasamak a pannaka-uram ti maysa a bungalow house, agarop alas 8:35 ti rabii idi Domingo, Agosto 3, 2025 idiay Sitio Upper Banks, Brgy. Poro, San Fernando City, La Union
Iti nasao a balay ket kukua ti agassawa nga Jaime ken Clarita Rillioroza, agtawen ti 75 ken 56.
Tallo a pamilya a pakairamanan ti agassawa iti agnanaed iti nasao a balay.
Maibasar iti inisyal nga imbestigasyon dagiti otoridad, agpar-parang a nabaybay-an a nakasindi a kandila iti maipagarop a nakaigapwan ti napasamak nga uram. Naamwan a saan pay a naisubli ti power supply iti nasao a paset ti barangay.
Kabayatanna, iti interview ti Bombo Radyo La Union kenni FCINSP Edwin Orejudos, agdama a City Fire Marshal, kinuna na a manipud iti rangtay iti nasao a lugar ket nagusar da iti innem a hose ken pinagsisilpo da dagitoy tapno madanon iti balay a masebseban.
Inlawlawag ni Orejudos a saan a maka-asideg dagiti nagresponde a fire truck iti maur-uram a balay, gapu kadagiti naka-balandra pay laeng a kayo ken dadduma pay a debris nga intayab ti napalabas a bagyo emong, iti kalsada.
Nupay kasta, babaen iti napaspas a panagtignay dagiti firefighters, nakontrol da ti apoy, agarop alas 9:20 ken naideklara a fireout iti oras ti alas 9:30 ti rabii.
Awan ti nailista a natay wenno nadangran iti insidente, ngem malidayan dagiti bumalay gaputi pannakairaman a nauram ti sumagmamano a shih tzu puppies.
Innayon ni Orejudos nga ur-urayen da iti listaan dagiti napapateg nga alikamen a nauram nga isubmitir ti pamilya iti fire protection bureau tapno madetermina iti pakabuklan a danyos iti napasamak nga uram.
