BR LA UNION – Agtaltalinaed a napigsa kas Super Typhoon iti bagyo Bavi bayat nga adda pay laeng iti ruar ti Philippine Area of Responsibility (PAR).
Iti 10:00 PM advisory ti PAGASA, iti Super Typhoon Bavi (2609) ket naudi a nasaripatpatan iti kaadayu a 1,950 km daya ti Southeastern Luzon (OUTSIDE PAR).
Kabuyog na iti kapigsa ti angin nga umabot iti 205 kilometro kada oras asideg iti sentro, ken kapegges nga umabot ti agingga 250 kilometro kada oras.
Dup-dupagenna iti direksyon a laud amianan-a-palaud iti kapaspas a 25 kilometro kada oras.
Nupay bassit ti tiyansa nga ag-landfall, posible met a mapasaran iti napigsa ken nalawa nga epekto ti napigsa nga angin a dumanon ti agingga 800 kilometro manipud iti sentro.
Segun iti weather bureau, namnamaen a sumrek ti Super Typhoon BAVI, a maawagan ti Super Typhoon Inday iti Philippine Area of
Responsibility (PAR) inton rabii ti Martes (July 7) wenno agsapa ti Miyerkoles (July 8).
Agtalinaed a Super Typhoon inton sumrek iti PAR ngem namnamaen a kumapsot inton umasideg iti Extreme Northern Luzon nga agturong iti daya ti Taiwan.
Posible a mapadasan ti narungsot a panawen iti dakkel a paset ti pagilian, mangrugi ita nga aldaw ti Martes ken Miyerkoles gaputi habagat wenno southwest monsoon.
Namnamaen pay ti pannakaingato ti Signal #2 ken Signal #3 bayat ti panagdalyasat ti bagyo iti northern ken eastern portion ti Northern Luzon, Southern Luzon ken Visayas mangrugi inton rabii (July 7).
Mabalakadan ti publiko nga agtalinaed a nakaalerto iti abiso dagiti otoridad ken agsagana iti anyaman a panagbaliw ti kasasaad ti panawen.
