Maysa kadagiti kapigsaan a super typhoon ita a tawen iti dimmuprak kadagiti teritorio ti Estados Unidos iti Pacific idi Lunes, agraman dagiti isla nga ayan dagiti napapateg a base militar ti America.
Direkta a tinamaan ni Super Typhoon Bavi iti isla ti Rota sadiay Northern Mariana Islands. Katupag daytoy ti Category 5 hurricane, nga addaan ti maximum sustained winds a nasurok 180 a milia tunggal oras ken manamnama a dumanon iti nasurok 150 a milia iti tunggal oras iti isla, segun iti National Weather Service.
Nagpakdaar dagiti autoridad iti posible a nakaro a pannakadadael kadagiti pasdek, pannakatumba dagiti kayo ken linya ti koriente, ken napaut a pannakapukaw ti koriente. Manamnama met ti napigsa a tudo a mabalin a pakaigapuan ti nasaknap a flash floods, kasta met iti napeggad nga storm surge ken panaglayus iti igid ti baybay gapu iti dadakkel a dalluyon ken napigsa nga angin.
Masarakan iti Rota iti agarup 50 a milia iti amianan ti Guam, a pagtaengan ti sumagmamano kadagiti kapatgan a pasilidad ti militar ti Estados Unidos iti Pasipiko, karaman iti Andersen Air Force Base ken US Naval Base Guam. Nasurok a 7,000 nga aktibo nga agtartrabaho a soldado ti nakapuesto idiay Guam nga addaan ti populasion a nasurok 150,000.
Segun iti militar ti Estados Unidos idiay Guam, adda iti kangatuan a lebel ti storm readiness bayat manamnama ti makadadael nga angin ken napigsa a tudo.
Kabayatanna, agsagsagana metten dagiti umili ti Saipan ken Tinian, 115 milia iti amianan ti Rota, para iti epekto ti bagyo. Posible met a mapasaran ti dua nga isla ti Category 1 hurricane-force winds a nasurok 74 a milia iti kada oras.
Agtultuloy iti panagbangon dagiti sumagmamano a paset ti Saipan ken Tinian manipud iti panagduprak ti Super Typhoon Sinlaku idi Abril, a nakaigapuan ti nasaknap a layus, napaut a pannakapukaw ti koriente, ken nalawa a pannakadadael dagiti pagtaengan ken imprastruktura.
Manamnama a rummuar ti Super Typhoon Bavi idiay Marianas inton malem ti Lunes (oras idiay Amerika) bayat nga aggungunay nga agpalaud iti kapartak a 10 agingga iti 13 a milia iti kada oras.###
