LA UNION – Nakaituding a mangipila ti Office of the Solicitor General (OSG) iti kaso a quo warranto kontra ken ni suspended Bamban Mayor Alice Guo.
Daytoy ket kalpasan a pinasingkedan ti National Bureau of Investigation (NBI) a ti fingerprint ti nasuspende a mayor ket agpada iti Chinese national a ni Guo Hua Ping.
Iti maysa nga statement, kinuna ni Solicitor General Menardo Guevarra a mabalin a maibilang a breakthrough ti naduktalan ti NBI nga ur-urayen ti Office of the Solicitor General a nanglawlawag iti adu a saludsod mainaig iti pudno a kinasiasino ni Guo, agraman ti nasiyunalidadna.
Siniguro na pay a naparpartak itan ti ar-aramiden da a legal nga aksiyon.
Ipila ti Office of the Solicitor General ti kaso iti kabiitan a panawen bayat a madama iti panangrepaso kadagiti existing draft kalpasan ti findings ti NBI.
Maipalagip nga immunan a pinasingkedan ni Sen. Risa Hontiveros a dagiti natakuatan ti NBI ket mangkumpirma ti atap na a ni suspended Mayor Guo ket maysa a peke a Pilipino nga agpam-pammarang a Pilipino tapno maka-aramid iti krimen.
Kasaruno daytoy, immapela ti Senador iti Office of the Solicitor General a pas-pasan ti panangipila ti kaso a quo warranto kontra ken ni Guo.
Iti quo warranto ket legal a pamay-an a mangkarit wenno mangbusor iti karbengan wenno bileg ti maysa a tao iti takder na wenno posisyon daytoy.
