Insingasing ni House Deputy Speaker ken Las Piñas Representative Camille Villar ti tallo nga aldaw a mental health wellness leave kadagiti empleado ti gobierno ken pribado a sektor.
Daytoy ket linaon ti House Bill number 10929 nga inpila ni Villar a mangikalikagum a ti nadakamat a 3-day mental health wellness leave ket mabayadan a naan-anay para kadagiti amin nga empleado iti intero nga archipelago.
Panggep ti singasing ni Villar ket tapno mapasayaat ti labour productivity ken efficiency dagiti mangmangged.
Maysa iti singasing ni Villar a dalan tapno mapalawa ti pannakaammo ti Pilipino maipapan iti kinapateg ti mental health, saan laeng a para iti tunggal mangmangged no di ket para iti pagimbagan ti intero a pagilian.
Segun kenni Villar, ti singasingna ket maitunos iti Republic Act No. 11036 wenno ti Mental Health Act a mangitantandudo iti karbengan ti tunggal Pilipino para iti nasayaat a kasasaad iti kapanunotan ken nasayaat a serbisio a mainaig iti daytoy.
