LA UNION – Naituding a maidatagan iti kaso ti barangay tanod a nangtutok iti paltog iti lamayan kalpasan a naabak iti sugal idiay Brgy. Poro, San Fernando City, La Union.
Kaso nga attempted murder ti maidatag kontra ken ni Joselito Abuan, 42-anyos, nga agtultuloy nga an-anupen dagiti otoridad.
Kabayatanna, iti pannakiuman ken ni Brgy. Captain Godofredo Hufana, inaklonna a dismayado isuna ken ni Abuan a nangaramat iti posision dagitoy kontra iti nakasinnupiatna iti lamay.
Maipalagip a naabak ni Abuan manipud iti nagreklamo a ni Mark Joseph Carino, 30-anyos, banag a nakarurodan ti barangay official ket ginandatna a paputoken ti iggemna a paltog ngem pimmalya daytoy.
Napaspas a naglibas ti barangay tanod kalpasan ti insidente.
