BR LA UNION – Kinumpirma ti Department of Justice a mangrugin ti plano a technical diving operation idiay Taal Lake.
Daytoy ket tapno biroken dagiti posible a rurog dagiti mapukpukaw a sabungero a makunkuna a naibelleng iti nasao a paset ti dan-aw.
Segun kenni Justice Secretary Jesus Crispin Remulla, mangrugi ita a lawas ti technical diving operation idiay Taal Lake.
Idaulwan daytoy dagiti ahensiya ti gobyerno babaen ti tulong ti Philippine Navy ken Philippine Coast Guard, nga immuna a nangipakaammo iti kinasaganada para iti operasyon.
Nupay kasta, inlawlawagna a saan a mainaig daytoy iti kiddawda a tulong manipud iti gobyerno ti Japan para iti kanayunan nga alikamen.
Inlawlawag ti sekretaryo a naipatulod laeng idi napan a lawas ti surat, isunga ita pay laeng a manamnama a maawatda ti sungbat a maipatulod.
Innayon pay ni Justice Secretary Remulla a saan a mailaksid ti posibilidad a mabalin nga adda pay sabali a lugar a nakaiballengan dagiti mapukpukaw a sabungero.
Ngem iti laksid daytoy, impaganetgetna a napigsa ken natibker ti iggemda nga impormasyon nu sadino ti rumbeng a pakaisayangkatan ti technical diving operation.
Maipalagip nga imbutaktak iti rimuar a testigo a ni alyas ‘Totoy’ a managan Julie ‘Dondon’ Patidongan, ti nasao a rebelasyon seknan dagiti mapukpukaw a sabungero.
