BR LA UNION – Impalawag ti maysa nga school principal iti maipatungpal a Three-Term School Calendar ti Department of Education (DepEd) ita nga school year 2026-2027.
Daytoy ket maysa nga allagaden iti edukasyon a mabingay iti tallo a paset wenno termino iti regular nga school year kasukat ti tradisyunal nga uppat a grading periods wenno dua a semester.
Segun kenni Principal Aurie Amore Quiñones ti Baccuit National High School, iti first term ket manipud Hunyo agingga Setyembre, iti second term ket manipud Setyembre agingga Disyembre, ken iti third term ket manipud Enero agingga Abril ti sumaruno a tawen.
Iti first term ket maawagan kas Opening Block, a nakalatang para iti enrollment, orientation dagiti teachers ken learners, assessment, tapno agbalin a nasayaat iti taray ti school year 2026-2027.
Iti second term ket maawagan nga Instructional Block, wenno tuloy-tuloy a panagisuro ken panagadal, maibilang a pinaka-krusyal kadagiti tallo a termino, ken awan ti rumbeng a disruption wenno lapped iti panangisayangkat ti klase.
Iti third term wenno End-of-Term Block ket nakalatang para iti eksaminasyon, panag-compute iti grado, ken panangipaay iti remedial wenno kanayunan a tulong kadagiti agad-adal.
Inlawlawag pay ti opisyal a saan a mapukaw dagiti extra curricular activities, agsipudta adda ti maaw-awagan a 10 days end of term block a pakaisayangkatan amin nga extra curricular activities iti intero nga school year.
Ranta ti nasao a polisiya a maurnos iti taray ti panagisuro, maipaayan ti naan-anay nga inana dagiti agad-adal ken mangisursuro, ken maliklikan ti makabannog a kaadu ti adalen dagiti estudyante gapu iti suspensyon ti klase ken dadduma pay nga aberya.
Impanamnama ni Quiñones nga agbalin a naan-nayas ken natalna iti pakabuklan nga school year 2026-2027 babaen ti pannakitinnulong dagiti estudyante, nagannak ken mangisursuro.
