BR LA UNION – Mangaramid ti dua nga Executive Order (EO) ni US President Donald Trump para iti programa a mangikkat iti diversity, equity, ken inclusion (DEI), partikular iti military base idiay U.S.
Iti maysa nga EO ket mangipawil kadagiti transgender nga agserbi iti U.S. military ken tarigagay ni Trump nga ikkaten ti immuna a direktiba ni sigud a President Joe Biden idi 2021 a mangipalubos kadagiti transgender nga agserbi iti militar.
Iti nasao a baro nga EO ket mangipaay ti nair-irut pay nga allagaden seknan iti panagusar dagiti pronoun ken gender identity, ken naan-anay nga ipawil dagiti transgender nga agserbi iti militar.
Segun iti White House, paset daytoy iti nalawlawa a laban kontra iti inawagan ni Trump a “gender insanity”.
Malaksid dayta, plano pay nga isubli ni Trump dagiti kameng ti militar a naikkat gaputi panagkedked iti COVID-19 vaccine mandate, ken ipaayanna pay dagitoy ti back pay ken isubli iti ranggo.
Impaganetget ti White House a ti nasao a pammilin, a panangbaliw iti polisiya ti militar ket mangipaay prayoridad iti merit-based hiring ken ikkaten iti accommodation para kadagiti saan met a makagun-od iti pisikal a pagkasapolan ti serbisyo.
Mangted pay daytoy ti prayoridad kadagiti grupo a kas ti minorya, babbai ken adda diperensiya ti bagi na a makaala ti trabaho.
Kabayatanna, maibasar iti impormasyon ti Bombo Radyo Aklan manipud kenni Bombo International Correspondent Pinoy Gonzales idiay Texas, USA, adda ti aganay 15,000 a transgender ti posible a maikkat iti US military, uray dagiti nabayagen iti serbisyo, nangato man wenno nababa ti ranggo na.
