LA UNION – Kinumpirma ti Department of Health (DOH) ita nga aldaw ti Lunes nga adda maysa a baro a kaso ti MPOX ditoy pagilian.
Gaputi dayta, pakabuklan itan a 10 iti nailista a kaso ti MPOX a sigud a maaw-aagan ti monkeypox.
Segun iti ahensiya, iti kaso a nailista idi kalman, Agosto 18, iti umuna a kaso ti mpox a nadetermina ita a tawen, manipud iti naudi a kaso idi Disyembre 2023.
Iti baro a kaso ket 33-anyos a lalaki, awanan ti history na a nagbiyahe iti ruar ti pagilian, ngem naaddaan ti intimate contact, tallo a lawas sakbay a rimuar dagiti sintomas.
Segun iti DOH, dagiti rimuar a sintomas ket panaggurigor, kalpasan ti uppat nga aldaw ket rimuar dagiti pantal wenno rashes iti rupa, likod, teltel, takyag, singit, agraman iti dakulap ken dapan.
Naiturong ti pasyente iti maysa nga ospital ti gobyerno ket naala-an ti specimen manipud kadagiti sugat na iti kudil ken naamiris baban ti real-time polymerase chain reaction (PCR) test.
Segun iti World Health Organization (WHO), dagiti sintomas ti mpox ket pakaibilangan ti skin rash wenno mucosal lesions, panaggurigor, panag-sakit ti ulo, panagut-ut ti las-lasag, panagsakit ti likod, nababa nga enerhiya, ken ag-swell wenno bumsog iti lymph node.
Indeklara ti WHO idi Hulyo 2022 iti mpox kas global public health emergency iti maikadwa a gundaway iti uneg ti dua a tawen, kasaruno ti napasamak nga outbreak ti nasao a viral infection idiay Democratic Republic of Congo agingga a nagwaras iti kaarruba ken kabangibang a pagilian.
