BR LA UNION – Maisentro iti maipagarop nga unexplained wealth ken isyu iti Statement of Assets, Liabilities, and Net Worth (SALN) ni Vice President Sara Duterte iti sumaruno nga impeachment hearing ti Kamara inton Abril 22.
Segun kenni House Committee on Justice Chairperson Gerville Luistro, nangipaulog ti komite iti subpoena para kenni sigud a Senador Antonio Trillanes IV ken sumagmamano nga ahensiya ti gobyerno tapno obligaren a dumar-ay iti hearing.
Maibilang ni Trillanes a paset ti Saballa et al impeachment complaint, partikular iti isyu ti saan a mailawlawag a kinabaknang ti Bise Presidente.
Malaksid iti sigud a senador, kinumpirma pay ni Luistro a naawis dagiti opisyales manipud iti Anti-Money Laundering Council (AMLC).
Manamnama met a maisubmitir dagiti dokumento mainaig iti bank transaction ti agassawa a Sara ken Manases Carpio.
Manamnama pay a dumar-ay iti hearing dagiti mangibagi manipud Securities and Exchange Commission (SEC), Bureau of Internal Revenue (BIR), ken Office of the Ombudsman.
Agserbi ti scheduled committee meeting kas clarificatory hearing tapno malawlawagan dagiti alegasyon kontra iti bise presidente, karaman ti maipagarup a saan a kompleto a deklarasyon ti assets ken kinabaknangna.
