LA UNION – Maysa nga unexploded ordnance (UXO) iti nakali dagiti otoridad iti sangwanan ti Philippine Coast Guard Station a nakabase iti Poro Point, San Fernando City, La Union wenno asideg ti plantasyon ti Shell Company.
Maibasar iti report, immuna nga impaka-ammo ni Coastguard Petty officer third class Marvin Taipan y Castillano, agtawen ti 38, baro, ken residente ti Bolinao, Pangasinan iti San Fernando City Police Station seknan iti nadiskubre na nga unexploded ordnance (UXO) iti amianan a paset ti ngalay ti kalsada, bayat a mang-mangan ti streetfoods.
Dagus met a nagresponde dagiti otoridad kadwa da ti La Union Provincial Explosive Canine Unit (1st LUDECU), City Disaster Risk Reduction and Management Office ken Regional Explosive Canine Unit 1 nga indaulwan ni PMAJ Orville R. Zambrano.
Manipud alas 6:00 ti sardam agingga alas 10:00 idi rabii, Hunyo 25, a nagpaut ti panang-kali da ti nasao a corroded projectile, a nailadawan kas 12 a pulgada ti kadackel na, agdagsen ti 990lbs, Armour Peircing, awanan ti safety lever ken fuze assembly agsipudta nai-semento daytoy manipud iti pannaka-hulma na.
Iti nasao a projectile ket nai-turnover ken adda itan iti kustodiya ti Regional Explosive Canine Unit 1 para iti umno a disposal daytoy.
