Saan a mailadawan ti bilyonaryo a ni Jared Isaacman ti ragsak na kalpasan a makumpleto na ti kaunaan a civilian spacewalk.
Sumagmamano met a milyon ti imbayad na iti CEO ti payment processing company tapno makasakay iti SpaceX ken makasabay iti Polaris Dawn mission.
Kakadwa na iti daitoy a delikado nga space mission isuda retired U.S. Air Force Lieutenant Colonel Scott Poteet ken dagiti empleyado ti SpaceX nga isuda Sarah Gillis ken Anna Menon.
Ni Isaacman ket nagbalin a kaunaan nga indibidwal a marikos ti space ti kangato a 435 a milya manipud ditoy Earth.
Kalpasan ti panagpagna ni Isaacman ket simmaruno met ni Gillis a nangisayangkat ti spacewalk.
Nairecord ti Polaris Dawn ti kangatuan a nagrikos ditoy lubong bayat nga isuda Gillis ken Anna Menon dagiti kaunaan a babbae a nagbiyahe a kangatuan manipud ditoy Earth.
Kabayatanna, daitoy metten ti sumaruno a kaadawan a nabiyahe ti tao manipud idi nagleppas ti Apollo program ti NASA idi tawen 1972.
Dinayaw met ni NASA administrator Bill Nelson ti SpaceX ken Polaris Program gapo ti naaramid a kaunaan nga commercial spacewalks.
Tawen 2021 idi nagbayad met ni Isaacman tapno mapondoan ti Inspiration4 flight ti SpaceX.
Maipalagip nga immuna a nagturong iti space ti bilonaryo a ni Richard Branson idi Hulyo 2021 lugan iti Virgin Galactic Unity 22 a sinaruno ni Jeff Bezos kalpasan ti sumagmamano nga aldaw sakay met iti bukod na a Blue Origin NS-16.
