BR LA UNION – Agtultuloy a napigsa ti demand kadagiti nalamiis nga inumen iti tengnga ti nakaru a pudot ti panawen, partikular ti tubbog ti niyog wenno buko juice, a maysa kadagiti paborito nga inumen a mangpunas ti pannaka-waw.
Iti 10 ken 20 pesos a kuwarta ket makagatangen ti maysa a baso ti nalamiis ken presko a tubbog ti niyog.
Kabayatanna, maysa a bukel ti buko juice ket agbalor ti 60 agingga 65 pesos, depende ti kadakkelna ken suplay iti merkado.
Segun kenni Marcelina Caralipio, buko juice vendor, makailak-lakoda iti agarup 50 a pidaso ti buko kada aldaw nu adda eskuwela, ngem gaputa bakasyon, bimmaba iti 38 a pidaso ti kada aldaw gaputa awan dagiti estudyante kadagiti pagadalan a kangrunaan a kustomer dagitoy.
Ipan-pannakkel ni Caralipio iti pagbiagan da, agsipudta naggapo iti panaglak-lako da ti buko juice iti inusar da a nangpa-adal iti uppat kadagiti innem nga annakda, ken agtultuloy ti napinget a panagtrabahoda tapno mapa-turpos da pay iti dua nga annak da.
