Personal a dimmar-ay ita nga aldaw ni Bise Presidente Sara Duterte ti panagdengngeg ti House Committee on Appropriations seknan ti singasing a P902.8-M a pondo ti opisina na para inton tawen 2026.
Naangay ti delibersyon sadiay Kamara ken nadakamat ti alokasyon ti pondo para ti Office of the Vice President (OVP).
Maipalagip a na-reschedule ti panagdengngeg kalpasan a saan a dimmar-ay ni VP Sara di Setyembre 12 napalabas a lawas, nu ketdi, ti assistant secretary na ti naipatulod ngem saan met nga inawat daitoy ti komite kas umdas a mangibagi iti Bise.
Segun kadagiti mamanday-linteg, tradisyon iti Kamara a ti lider ti ahensya wenno maysa nga undersecretary iti nasken a sumango ti budget hearing.
Nangiruar metten ti waragawag ti OVP a nagkuna a nakasagana kuma a dumar-ay ti Bise Presidente idi Setyembre 12 ngem naballaagan isuda ti sponsor ti budget a saanen nga agtuloy agsipud ta awan met ti undersecretary a makaapan.
Kumidkiddaw ti OVP ti aganay P902.8-M para inton 2026 a nangatngato ngem iti P744-M nga alokasyon ita a 2025. Segun iti opisina, ti kanayunan a pondo ket mausar para ti panangpalawa ti programa ken serbisyo ti OVP.
Daitoyen ti umuna a panagbisita ni VP Sara sadiay Kamara manipud pay idi Nobyembre 2024 nu sadino ket simmango isuna para ti panagdengngeg ti panagabuso ti pondo. Dagiti nasao nga alegasyon ti nagbalin a basaran ti impeachment case nga impila kenkuana dagiti mamanday-linteg.
