LA UNION – Natay ti maysa a motorcycle rider bayat nga agtultuloy a maag-agasan iti ospital ti maysa a tricycle driver iti napasamak nga aksidente a nakairamanan ti tallo a lugan iti national highway idiay Barangay Quinavite, Bauang, La Union alas-11:50 idi rabii.
Nabigbig ti pimmusay a ni Dan Lester Baladad, 28, residente ti Barangay Tanqui, siudad ti San Fernando bayat a nadundunor ni Elijah Danniel Sarmiento, 21, residente ti Barangay Bacuit Norte iti nasao nga ili.
Maibasar iti imbestigasion ti Bauang Municipal Police Station, naidungpar ti manmanehuen a motorsiklo ni Baladad iti nakasinnabatna nga sports utility vehicle (SUV) a minaneho ti negosiante a ni Edgardo Canlas ti Muntinlupa city, kasaruno ti pannakadungpar ti traysikel a patpatarayen ni Sarmiento.
Naideklara a dead on arrival iti pagagasan ti motorcycle rider gapu kadagiti nakaro a sugat a sinagrapna iti bagina.
Naka-confine met ken agpapaimbag ni Sarmiento iti Ilocos Training and Regional Medical Center.
Nagasat met nga awan ti nasugatan kadagiti nakasakay iti SUV.
Iti agdama ket agtultuloy ti imbestigasion ti pulisia tapno maamuan no asino ti agsungbat iti insidente.
