BR LA UNION – Rinespondian ti Coast Guard District North Western Luzon (CGDNWLZN) Deployable Response Group (DRG), kadwa da ti Municipal Disaster Risk Reduction and Management Office (MDRRMO) ken Municipal Health Office-San Juan (LGU MHO), iti maysa a medical emergency iti igid ti kabaybayan partikular iti maysa a beach resort idiay Brgy. Urbiztondo, San Juan, La Union.
Dagus a nangipaay ti response team ti medical assistance iti maysa a 15-anyos a balasitang a narigatan nga umanges bayat a nakatugaw iti igid ti baybay.
Iti biktima ket managan Cassandra Sotto, kadwa na ti inana a ni Cherry Sotto, residente dagitoy ti Fairview, Manila.
Segun kenni Cherry, iti anak na ket addaan ti heart condition wenno sakit ti puso.
Kalpasan ti first aid nga impaay ti response team, inlugan da ni Cassandra iti maysa nga ambulansiya tapno maiturong iti Lorma Medical Hospital idiay Brgy. Carlatan, City of San Fernando, La Union, para iti naan-anay a pannakataming.
