BR LA UNION – Natay ti dua a lallaki bayat a maysa ti nadunor kalpasan a nakuryente da iti panangikabil ti landok a poste para iti solar street light iti igid ti national highway idiay Barangay Tubod, Santo Tomas, La Union, idi rabii ti Biyernes, Oktubre 31, 2025.
Maibasar iti report manipud Santo Tomas Municipal Police Station, napasamak ti insidente agarup alas 6:40 ti rabii.
Nabigbig dagiti biktima nga isuda Joseph Rapilo, legal age, addaan asawa ken residente ti San Fabian, Pangasinan; Christian Malicdem, agtawen ti 20, awanan asawa, ken residente iti Bugallon, Pangasinan; ken Junar Estibal, agtawen ti 33, addaan asawa, ken residente iti Brgy. Bonuan Binloc, Dagupan City, Pangasinan.
Iti inisyal nga imbestigasyon dagiti otoridad, makomikom dagiti biktima a mangikabil ti landok a poste ti solar street light idi aksidente a naisagid ti poste iti live wire wenno kable ti koryente.
Gaputi dayta, agpapada a nakuryente dagiti tallo a trabahador.
Dagus a naiturong da idiay La Union Medical Center idiay Agoo, La Union, ngem naideklara a dead-on-arrival babaen kenni Dr. Joseph Mannix F. Galimba da Rapilo ken Malicdem, idinto a nakalasat ni Estibal ken addan iti natalged a kondisyon.
Kabayatanna, agtultuloy ti imbestigasyon dagiti otoridad iti nasao nga insidente.
