LA UNION – Dead on the spot ti dua a motrocycle riders kalpasan a naidungpar iti maysa a truck idi nag-overtake idiay Aspiras highway a sakupen ti Brgy. Palina, Pugo, La Union.
Ti nakadungpar iti motorsiklo a nagluganan dagiti biktima ket maysa nga aluminum winged van (RLR 249) a minaneho ti agnagan iti Dencin Attiw, 34-anyos, tubo iti Brgy. Kias, Baguio City ken agnanaed idiay Pico, La Trinidad, Benguet.
Maibasar iti inisial nga imbestigasion ti pulisia, ginandat nga overtake ti motorsiklo a minaneho ni Genofre Sagampod iti Poblacion West, Pugo, La Union iti dua a behikulo ngem idi nagkambyo daytoy ket naidungpar metten iti nasao a winged van.
Natay gapu kadagiti nakaro a dunor a sinagrapda da Sagampod ken ti backride-na a ni Amorsolo Milan, 54-anyos, mannalon.
Saan met a naan-ano ti driver ti truck a ni Attiw.
Agtultuloy pay laeng ti imbestigasion iti nasao nga insidente.
