Indeklara ti House Committee on Justice iti dua a reklamo nga impeachment kontra kenni President Ferdinand Marcos Jr. nga ‘insufficient in substance’.
Iti botos nga 42 a pabor, 3 a kontra ken maysa nga abstain, naideklara nga “insufficient in substance” iti reklamo nga indatag ni Atty. Andre de Jesus ken inyendorso ni Rep. Jett Nisay.
Kabayatanna, iti sabali a botos, 39 dagiti kontra ken 7 ti pabor, ‘insufficient in substance’ met laeng ti reklamo nga indatag ti Makabayan bloc a mangibagbaga nga adda “betrayal of public trust” ni Marcos seknan iti maipagarop a saan a patas nga alokasyon ti pondo para kadagiti proyekto ti imprastruktura.
Idi Pebrero 2, dagiti agpada a reklamo nga impeachment ket immuna a naideklara a “sufficient in form,” ngem iti nainget a panang-tingiting ti komite, rimwar a saan nga umdas dagiti ebidensiya ken basaran tapno ituloy da daytoy idiay plenaryo.
Segun kadagiti miyembro ti komite, napateg a masiguro a dagiti reklamo nga impeachment ket addaan ti natibker a substansiya sakbay a maipasidong iti mas nalawa a deliberasyon ti Kamara.
Iti desisyon ket mangipakpakita ti nainget a karit kadagiti mangilunglungalong ti impeachment kontra iti Presidente, nangruna ket kontrolado dagiti kaalyado ti administrasyon iti nababa a pagpandayan linteg ti kongreso.
Nupay naideklara nga insufficient in substance ti dua a reklamo wenno kaipapanan a na-dismiss, inlawlawag ni Luistro nga iti level laeng dayta ti committee on justice.
Kasapolan nga aprubaran ti House plenary ti nasao a report, babaen ti resolution a kasapolan ti affirmative vote manipud iti one-third iti amin a miyembro ti komite.
Nu agdesisyon ti komite a naan-anay nga ibasura ti reklamo, saanen a mangputar pay ti house justice committee iti articles of impeachment.
