BR LA UNION – Nainget a banbantayan ita ti PAGASA iti tallo a low pressure area (LPA) a nasaripatpatan iti ruar ti Philippine Area of Responsibility (PAR).
Naudi a nasaripatpatan alas-2 ti malem iti maysa nga LPA iti ruar ti pagilian iti kaadayu a 745 kilometers (km) amianan-a-daya ti Itbayat, Batanes nga addaan ti “medium” potential a mabukel kas bagyo iti sumaganad a 24 oras.
Iti maysa pay nga LPA iti ruar ti PAR ket nasaripatpatan iti kaadayu a 2,105 km daya ti Extreme Northern Luzon ken addaan ti “high” potential a mabukel a bagyo iti sumaganad a 24 oras.
Bayat a ti maysa pay nga LPA, a remnant ti Tropical Depression Danas wenno sigud a bagyo Bising ket adda iti kaadayu a 580 km laud amianan-a-laud ti Itbayat, Batanes ket nababa unayen ti tiyansa a mabukel kas bagyo.
Iti agdama, saan a direkta a makaapekto iti pagilian dagiti mabukbukel a dakes a panawen.
