LA UNION – Tallo a tattao iti nadun-dunor, a pakairamanan iti dua a motorcycle rider ken maysa a masikog, kalpasan ti panagdinnungpar iti minaneho dagitoy a motorsiklo iti kawatiwatan ti kalsada a sakop ti Barangay Sevilla, San Fernando City, La Union.
Nabigbig dagiti driver nga isuda Gerardo Patacsil, 20, residente ti Barangay Dili, Bauang, La Union ken Dante Delfin, 35, addaan ti asawa, residente ti Payocpoc Este, Bauang, La Union.
Iti met biktima a masikog ket managan Ma. Teresa Sonza, 19, residente ti Barangay Catbangen, San Fernando City.
Maibasar iti report, ni Delfin ti maipagarop a dimmungpar iti motorsiklo ni Patacsil.
Nagresulta daytoy iti pannakatumba iti dua a lugan ken agpapada a nagsagaba dagitoy ti pannakadun-dunor.
Iti masikog a ni Sonza ket dagus a naiturong iti ITRMC tapno mataming.
