LA UNION – Aganay 41 a kabarbaro a pulis manipud CL 01-02 2021 MAGTALAS, iti maipaspasidong iti Community Immersion Program for Basic Internal Security Operation Course idiay Barangay Lettac Sur, Santol, La Union.
Indaulwan ni PLt Marcelo Paneda, Officer-in-Charge ti Santol Police Station ken Head Facilitator, iti umuna nga aldaw a panagsanay dagiti BISOC trainees idi kalman, September 6, 2021.
Iti panagbetla ni Paneda, impaganetget na kadagiti trainees a ti misyon dagitoy ket tulongan ti komunidad a masungbatan ti pagkasapolan dagiti lumugar, papintasen pay iti pannakikadwa kadagiti residente ken local officials.
Iti community immersion program (CIP) ket paset iti agtultuloy nga implementasyon ken panang-suporta iti programa ti National Task Force to End Local Communist Armed Conflict (NTF-ELCAC) a pananglaban ti insurhensiya ken kriminalidad.
Iti sidong ti nasao a programa, dagiti police trainees ket agtalinaed iti nasao a barangay iti siyam nga aldaw wenno agingga Setyembre 14, 2021.
Sumagmamano kadagiti BISOC trainees, ket nagturpos iti technical courses a kas electricians, carpentry, plumbers, nurses, teachers, criminology ken engineers, a paka-benipisyaran dagiti indigenous people iti nasao a barangay.
