Dumanonen ti pito ti bilang dagiti pimmusay ken pito metlaeng dagiti nadundunor kasaruno ti panagduprak ti Bagyong Basyang idiay Northern Mindanao.
Segun kenni Director Antonio Sugarol ti Office of the Civil Defense (OCD) Region 10, uppat a tattao ti kumpirmado a natay iti panagreggaay ti daga idiay Barangay Agusan, Cagayan de Oro City.
Iti listaan met dagiti nadundunor: dua ti manipud Cagayan de Oro, tallo idiay Gingoog City, ken dua idiay Iligan City, bayat a maysa iti agtaltalinaed a mapukpukaw idiay Tagoloan, Lanao del Norte.
Kabayatanna, immun-unan nga impadamag ti Public Information Officer ti Iligan City Police Office iti Bombo Radyo Cagayan de Oro a tallo ti natay iti Ciudad da ngem awan pay iti kumpirmasyon mainaig kadaitoy ti OCD-10.
Pagaammo a karaman ti maysa a periodista a natay kalpasan a maatake iti puso idi nalayos iti pagtaengan da, ken dagiti dua pay a bangkay a narekobre iti karayan.
Para ti pakabuklan, nasurok 40K a pamilya ti apektado idiay Northern Mindanao gapo iti rungsot ni Bagyong Basyang nga itan ket bimmaban iti Low Pressure Area ti kategorya na.
Kabayatanna, naipaayan da met kadagiti food and non-food items manipud Department of Social Welfare and Development (DSWD).
