LA UNION – Agtultuloy nga im-imbestigaran dagiti otoridad ti pakabigbigan ti suspek a nangala ti tolda ken nangdadael ti tents nga inted ni sigud a Congressman Pacoy Ortega kadagiti mangngalap sadiay Barangay Bagbag, Bauang, La Union.
Naireport sadiay Bauang Municipal Police Station, alas-7:10 ti bigat idi Pebrero 13, 2025 a nadiskubre ti agassawa a fish vendor nga isuda Edilberta ken Noel Rimas ti pannakapukaw dagiti tolda ken nakasuratan ti “Pagsayaatan ti Segundo Distrito Pacoy Ortega”.
Segun iti dua, mapukpukaw pay ti maysa nga steel bar ti tent ken dagiti laengen frames ken sumagmamano a poste ti nabati iti lugar.
Ti insidente ket nakadismayaan dagiti mangngalap iti nasao nga barangay gapo iti pannakadadael dagiti naipaay a tent kadakuada nga agserserbi a linong kabayatan ti panaglako dagitoy.
Pagaammo nga maysa a puraw nga van ti mapagduaduaan a nagluganan ti saan pay nabigbig a suspek ti umay nagsiim-siim sakbay a napasamak ti insidente.
