BR LA UNION – Dinipensaan manen ti Armed Forces of the Philippines (AFP) iti presensya ti Typhon missile launcher ti Estados Unidos ditoy pagilian kalpasan iti baro a waragawag ti China .
Segun kenni AFP spokesperson Col. Francel Margareth Padilla, paset daytoy iti nabayagen nga alyansa pangdepensa ti Pilipinas ken Estados Unidos.
Kinuna ni Padilla, iti missile system ket para iti panagsanay tapno mapasayaat pay iti kinasagana ti pagilian ken kabaelan iti depensa.
Nagpanawagan ti China nga ikkaten iti missile launcher, nga inawagan da nga “offensive weapon.”
Impaganetget ni Chinese Ministry of National Defense spokesperson Senior Colonel Zhang Xiaogang, a ti presensya ti nasao a weapon ket mangingato laeng ti tensyon iti rehiyon ken mang-peligro iti seguridad ti Pilipinas.
Banag a pinaglibakan ti AFP ket imbaga na nga awan ti intensyon ti Pilipinas a palawaen iti teritoryo daytoy.
Imbaga pay ni Padilla a ti puwersa armada ti pagilian ket para iti depensa, saan ketdi a pang-sakop.
Innayon na nga awan ti kari nga impaay ti AFP nga ikkaten ti missile system, ken maus-usar daytoy a pagsanay ti tropa nangruna ket adda iti plano a mangipatunghpal ti Pilipinas ti bukod na a sistema.
Naiyakar ti missile system manipud Laoag City, Ilocos Norte a nagturong iti saan a nadakamat a lokasyon.
Kabayatanna, immunan nga inwaragawag ni President Ferdinand Marcos Jr. a nakasagana a mangikkat daytoy nu isardeng ti China iti agresibo nga aksyon na idiay West Philippine Sea.
