BR LA UNION – Walo a tattao ti natay bayat a maysa ti nasugatan kalpasan a nauram ti residential building idiay Barangay San Isidro, Quezon City.
Segun iti Bureau of Fire Protection (BFP) nangrugi ti uram iti tallo a kadsaaran a pasdek a kukua ti maysa a Ruth Capili agarop alals-2:02 ti agsapa.
Naideklara nga under control ti uram iti oras alas 2:26 ti agsapa ken naan-anay a nasebseban iti uram alas 2:48 ti agsapa.
Dagiti biktima ket pakaibilangan ti dua a 34-anyos a babbai, maysa a 29-anyos a lalaki, dos-anyos nga ubing a lalaki, maysa a 20-anyos a babae, maysa a 40-anyos a lalaki, maysa a 12-anyos a lalaki ken maysa a 15-anyos a babae.
Nabigbig met iti nasugatan a biktima a ni Jophel Samosa, 36-anyos a naiturong iti ospital.
Umabot iti P3.6 milyon iti mapatta-patta a kantidad ti damyos ti napasamak nga uram.
Agtultuloy ti isay-sayangkat nga imbestigasyon ti BFP iti nasao nga insidente.
